concurs.jpg

KM-5.JPGКöрткерöс районса Нам посёлокын джынсьыс унджык олысьыс лыддьысьö сэтчöс библиотекаын, тшöтш и челядь. И таын, дерт жö, медся ыджыд пайыс библиотекаöн веськöдлысь Валентина Бицадзелöн, коді öзтöма сиктсалöн сьöлöмын небöг дорö муслунсö.

Изьва вожысь

Валентина Александровна дженьыдика казьтыштіс челядьдырсö:
—Чужи-быдми Изьва районса Краснобор сиктын. Александр Семёнович батьöй да Тамара Петровна мамöй велöдісны сэтчöс школаын. Водз мусмис меным книгаыд. И таысь колö аттьöавны бать-мамöс. Пыр тай вöлі лыддьыся, небöгсö киысь эг лэдзлы.
Шöр школа помалöм бöрын сійö велöдчöма Сыктывкарса культпро-светучилищеын библиотекарö. Помалöма 1979 воын гöрд дипломöн. Сöвет власьт воясö вуз-техникум помалысьтö сідз шусяна распределение серти мöдöдлöмаöсь удж вылö. Валентина веськалöма Кöрткерöс районса Нам посёлокö.
1979 вося август 3 лунö сійö медводдзаысь воськовтöма библиоте- ка порогсö. А син водзас — тыртöм вежöс! Сэки Лопыдін грездысь библиотекасö буретш вöлöм вуджöдöмаöсь Намö. И абу на удитöмаöсь меститны небöгъяссö. Том специалист сос пуджöмöн босьтчöма уджö. Ковмöма первой джадж-шкап-пызансö пыртлыны, сэсся машинаысь небöгсö ректыны... Том специалист сьöлöмсяньыс зільöма. И недыр мысти нин посёлокын олысьяс окотапырысь пыравлöмаöсь библиотекаас.


Татчö и кольччöма


Урчитöм куим во уджалöм бöрын Валентина Александровна, дерт, вермис мунны мöдлаö. Но... Та пыдди сійö уджысь орöдчывтöг велöдчöма Перымса культура институтын. Сэсся петöма верöс сайö, чужтöма кык пи. Тадзи и кольччöма Намö.
А воясыд тай öдйö лэбöны.
—Эг и тöдлы, кызь во колис, — тöдчöдіс ань. — Быттьö неважöн на библиотекаö волывлісны челядь, а, видзöда да, налöн нин ныв-пиыс пыравлöны небöгла.
Лыддьысянінлöн стрöйбаыс, дерт, вочасöн важмöма. Кызь воыд — вель ыджыд кадколаст. Валентина Бицадзелöн уджын тайö тшупöда пас кежлас Кöрткерöс районса администрацияöн веськöдлысьяс вöчöмаöсь аслыспöлöс козин: посёлокса вöвлöм детсадсö сетöмаöсь библиотека улö. Тайö вöлöма 1999 воын.

Аймуöс радейтны


Сэтчö öні любö пыравны. Югыд шоныд вежöсъяс, гöгöр небöг тыра джадж. Öти жырйын лöсьöдöмаöсь краеведческöй музей, кытчö Валентина Александровналöн водзмöстчöмöн чукöртöмаöсь важся эмбур, посёлоклöн историякöд йитчöм кабала-документ...
Менам волігöн урокъяс помасьöм бöрас ныв-зон пырисны библиотекаö. Томулов пиысь, видзöда да, öтияс пуксисны лыддьысьны, а му-öд заводитісны ворсны шахматöн. Вöлöмкö, Лопыдінысь да Чöтдінысь велöдчысьяс виччысьöны школаса автобус, медым гортас воöдчыны. Ывлаас ыркыд вöлі, а тані шоныд. Сэсся и машина виччысигмозыс челядь небöгъяс аслыныс бöрйисны.
Сёрниö воим да, зонпосни висьталісны, мый Валентина Александровна нуöдлö налы уна викторина, конкурс, ворсöм. Шуам, «По дороге в Читай-город» да «Кошкин дом» ворсöмъяс, «Шире круг» фольклор гаж...
Библиотекар сідзжö котыртöма книгакöд ёртасьысь зонпоснилы да верстьöлы некымын клуб.
—Чайта да, миянлы, верстьöлы, колö ёнджыка туйдны ныв-зонмöс радейтны небöг. Тöв чужъялöм да ышмöм пыдди мед челядь лыддьысисны. Книгаыд унаторйö велöдö, öзтö сьöлöмад Айму дорö муслун, ышöдö овны сöвесьт серти, — эскöдöмпырысь висьталіс Валентина Бицадзе.
Казьтышта, Валентина Александровналöн трудкнижкаас дзик öти пасйöд: «Индöма Кöрткерöсса шöр библиотека тэчаслöн Намса юкöнö...»
Матö 36 во сійö зільö тані библиотекарöн.

Михаил ЛАДАНОВ.
Кöрткерöс р.

Новости